2010/2/1（月曜日）
嚟緊幾日要 gift show， 所以都冇乜時間返學校做嘢， 趁今日處理埋啲雜務， 不過唔明嘅係點解學生要做咁多雜務囉。 咁多 staff 請返嚟都真係唔知做乜嘅， 是鬼但， 同自己都冇乜關係。
今日學校唔係好多人， 做完最基本嘅雜務之後都係自己悠悠閒嘅工作喇。 唔， 論文誌結果好似 confirm 咗喇， 唔知會點呢...
話時話今日開始落雪... 之前呢邊一路都冇雪落， 唔知點解自己去完玩雪之後呢邊都即刻落囉， 可能知道我玩唔夠都唔出奇...
2010/1/31（日曜日）
雪かき その二
其實尋日真係幾 overdraft 自己嘅體力， 不過個雪屋冧鬼咗， 有啲唔憤氣， 於是決定再 challenge 一次。 今次多兩個人幫手， 而且有當地嘅人指導點樣起好， 一定成功喇！ anyway 食好嘢之後， 準備開工！
除咗間雪屋之外， 仲有年糕， 手整嘅年糕對自己嚟講， 又係一次新嘅體驗喇。 或者有咁多唔同嘅新體驗就係自己鐘意嚟呢個地方嘅原因啦？ anyway 真係好過癮， 不過整年糕真係比起自己想像中要多好多體力，嗰䧸固咁嘅鎚真係唔知幾鬼重， 而且尋日 overdraft 咗嘅體力都未返返嚟， 都係俾其它人俾心機好啲， 自己繼續整雪屋。
整整整， 整到食完飯都繼續整， 五個人總算完成雪屋二號喇！
自己都真係冇嘢好講， 究竟鏟咗幾多雪出嚟呢？ 成身散哂， 不過滿足感真係唔知點樣形容好， 其它人入到嚟不停咁「すごい」嘅時候， 就真係覺得自己嘅努力冇白費囉。
可惜唔太多時間， 坐咗陣就要執嘢走喇。 今次又有機會識多幾個朋友， 真係不枉此行喇。 再咗五個幾鐘頭車， 返到屋企， 差唔多死咗喺度...
呢兩日嘅其中一啲相。 唔記得帶相機喇... 唯有用自己部電話嚟影... 收到朋友嘅相之後再 upload...
2010/1/30（土曜日）
雪かき その一
今朝要負責整早餐， 所以一早起身， 不過都好， 一起身就見到一大片積雪嘅山頭， 真係自己都唔信， 尋晚自己行過啲雪走上嚟都唔覺有啲乜， 不過始終有陽光就真係唔同啲。 anyway 整早餐嘛， 本身冇乜所謂， 不過日式嘅早餐自己又真係唔太識整， 所以做到嘅不過係一啲雜務之類喇。 你叫我整納豆我都唔知可以點整俾你喇。
anyway 食完早餐， 聽咗少少關於鏟雪時要注意嘅嘢， 唔， 好... 眼瞓... 不過冇瞓着㗎！ 全部都有聽到㗎， 不過唔知入唔入腦咁解之嘛。 anyway 準備好， 正式執工具去實習點鏟... 有時有啲地方結咗冰就真係幾係嘢， 同埋用個大雪鏟鏟時， 啲雪真係可以好鬼重囉。
跟住一日就咁不停咁鏟， 最初都着住件大褸， 不過越鏟越熱， 最後都係頂唔順， 剩得件短袖， 真係要寫個服字俾自己， 咁嘅溫度以咁嘅裝備出現... anyway 主要都係攻略之前住過嘅古民家， 起碼要俾個入口重見天日喇。
鏟到四點左右， 其實體力已經有啲去到限界， 不過有人開始鏟個雪屋， 最初都唔為意， 不過越鏟越 high， 尤其係 M 君同埋 M さん， 結果三個人係咁鏟， 其它人去咗温泉自己都唔停手。 係咁掘係咁掘， 完成咗間雪屋！ 基本上係一個空洞， 掘咗啲地方嚟坐， 整埋張檯， 基本上可以用嚟開 party 㗎！ －－ 冇錯， 其實係為咗之後開 party 用， 因為 H さん嘅生日嚟緊， 今日就提早俾個驚喜佢囉。
anyway 去温泉， 從來未試過覺得温泉可以咁舒服。 出面個露天風呂隔離仲要堆咗一堆雪喺度， 真係夠哂風流...
夜晚返到去， 啱啱到時間開飯， 同個温泉一樣， 特別好味嘅一餐， 人， 應該真係時不時體力勞動吓先得？ 食完嘢， 一齊去到個天花冧咗落嚟嘅雪屋... 冇錯， 就係之前啱啱整嗰間， 喺去温泉嗰陣時好似已經冧咗， 唔， 要冧都冇計， 還好唔係有人喺入面時冧， 如果唔係都唔知點算好。 anyway 去到坐咗陣，傾陣計， M さん偷偷哋去拎預先買咗嘅蛋糕出嚟， 開始唱生日歌。 始終係一個 surprise party， 主角基本上都唔知發生乜嘢事， 自己都唱埋一份， 哈哈。 見佢個反應真係幾有趣。 唱到個名時佢先知今次嘅生日會係幫佢開㗎囉。 哈哈。 幾好玩。 之後喺個冧咗天花嘅雪屋裏面食蛋糕， 對自己嚟講都係人生第一次經驗喇。 出奇地， 一啲都唔凍。 而且 S さん閧金口唱歌， 歌聲真係好得冇嘢好講... 而且周圍非常之靜， 好深印象嘅一曲...
之後返返上去分校（我哋瞓嘅地方）， 吹咗陣水， 尋日算係一早瞓咗， 今日都總算有時間可以慢慢吹吓水...
2010/1/29（金曜日）
そうだ、池谷へいこう
朝早都係去監考， 算係幾和平， 其中一個監考員， 之前好以住過喺香港幾年， 知道自己係香港人嘅時候自然地多咗話題。 幾有趣。 有機會真係想再傾多啲喇。
之後返學校， 幫個後輩 check 佢份 presentation 啲嘢， 尋日其實已經 check 咗喇。 差唔多每一頁紙都有 mistake， 真係唔係咁容易做到囉。 anyway 幫佢 check 完之後， 係咁易寫咗啲 code 之後， 都差唔多係時候出發去池谷， 上次十月頭去， 差唔多四個月喇。
去到池袋， 食啲嘢之後就見到朋友 M 君， 好似話仲有一個 S ちゃん會一齊， 不過未見過， M 君望住其中一個人似似哋樣， 但又唔敢肯定， 真係唔知點。 臨上車時嗰個人走嚟問“係唔係池谷？”， 先知道原來 M 君冇估錯...
anyway 坐車坐三個鐘頭多啲， 去到六日町， 等 N さん嚟接我哋， 之前都見過 N さん一次， 好多嘢講嘅一個人， 有時真係唔知點樣俾反應好囉。 冇計之下都真係下意識咁應佢。 anyway 去到池谷， 大大個山頭， 望幾望... 全部都係雪！ 真係好鬼爽囉。 點算， 唔係未見過落雪， 不過落到咁嘅樣真係第一次見囉。 嚇死人...
到咗之後食啲嘢， 見到幾個新朋友， 都係時候準備休息喇... .聽日要晨咁早起身... おやすみ
2010/1/28（木曜日）
Google 会社訪問会
朝頭早都係返學校監考， 冇乜特別， 平平穏穏。 不過有時見到啲學生可以寫錯自己個名時， 真係有啲擔心佢哋過唔過到個考試囉。
下晝又返 lab 做咗陣嘢， 好靜， 冇乜大件事。 不過好快夠鐘， 要去渋谷嘅 google 出席個会社訪問会， 詳細嘛， 有唔少講到 google 內部嘅嘢， 因為有守秘義務所以唔可以喺呢度 public 出嚟喇， 不過可以講嘅係自己會好想入呢間公司囉！ 唔， 始終仲有少少疑問未解決， 問埋先算。
2010/1/27（水曜日）
朝頭早返學校做咗少少嘢之後， 下晝又要監考。 其實都幾悶， 冇乜特別事發生， 天下太平... 不過可能上天見太過太平會悶親自己， 所以出咗啲怪事， 最尾個 section 本身連埋自己兩個學生監考， 點知一個人無端端冇出現， 死咗？ 而且唔少人， 真係唔知點好， 冇辦法之下唯有去試験本部到搵人幫手...
唔係咁 productive 嘅一日。 都冇辦法喇。 夜晚寫 resume...
2010/1/26（火曜日）
唔知痴咗邊條線， 六點無端端起咗身 ， 再瞓又瞓唔着， 都唔緊要喇。 反正都要準備。
返到學校做咗陣嘢， 下晝又要 meeting， B4 嘅 presentation， 上兩個禮拜先聽過， 不過真係麻麻哋， 有少少擔心佢哋過唔過到骨， 唔理得咁多喇。 不過真係悶到飛起， 瞓覺又唔係咁好.. 唔， 結果睡意竟然持續到 meeting 之後， 完全唔係做嘢嘅 mood。 本來同其中一個 B4 講幫佢 check 英文所以都冇 start 到自己嘅工作， 不過後來個 B4 喺冇聯絡嘅情況下走鬼咗， 喂出聲啦...
呀， 結果一整日都唔知自己做過啲乜嚟... 夜晚繼續ヴァルキュリア...