2007/2/17 (土曜日)
昨晚回來後和朋友傾左好耐， 好似四點幾先訓？ 不過這種出奇的精神也不過是咖啡因所誘發， 所以今朝晨咁早被叫去飲茶時真的很勉強才起身。
飲完茶和老豆阿哥去了花市運吉和搬花， 一朝早都唔算太多人， 乾貨那邊沒有幾多間舖頭有開門添。 好耐沒有聽過講價的聲音， 哈， 果然香港是不同的。 有人話這種講價是中國人溝通的文化之一， 係嘛？ 不過在這個社會的確是不可或缺的一環。
下午和一位朋友在元朗食點東西吹吹水， 不過可惜就係今晚唔可以一齊行花市喇。 很多謝喇！ 又食又拎， 唔係幾好意思添。
買少少東西後回去團年飯， 整個新年之中最重要的都可以話係這餐飯了。 家姐嫁了出去， 五個人的一餐飯。 很難想像以前有過大大少少的爭吵呢（我家的爭吵程度都幾嚴重， 好像大多數也和老豆有關）， 平平靜靜的說說笑， 可說是一種幸福呢。
之後出了去見一見一個月沒有見的朋友， 差不多年年也會和他們去行花市呢。 不過話就話行花市， 不過其實都係入去逼下之後出番黎食糖水， 食食下糖水時， 踏入丁亥年， 恭喜發財！ 利是來！