2008/6/16 (月曜日)
尋日享受咗一整日之後， 返到屋企就收到阿哥的 message..
屋企發生了事， S 打傷了媽， 如今她在家姐家住， 你有時間可打給她。
完全令人擔心的一件事。 呀， S 是一個十四歲左右（？）的人， 因為某些事情的關係寄住在香港家中， 都兩年吧？ 增添了不少麻煩的一個人。
點都好， 那個 message 真係有點唔清楚， 於是唯有朝頭早嘗試打電話俾屋企問清楚件事。 打咗好耐電話先打得通俾家姐。 問番清楚， 大概係因為那件 S 問阿媽拎錢不果， 要脅要爆門去拎錢咁喎。 跟住當然嗌起交啦。 阿哥好似也講咗幾句。 之後阿哥去咗番工， 剩下兩個人喺屋企， 那時又嘈起上嚟， S 仲要用菜刀要脅阿媽拎錢， 仲要講咗好多不知所謂的說話， 好似“遲早搵人殺你全家”等等， 神經病。
不過那時真係幾驚險， 最後好似係姐夫的細妹同佢男朋友幫手解決呢件事。 感謝佢地... 而阿媽似乎也不過是擦損咗少少， 冇乜大礙。 而屋企方面也即刻同 S 做退學手續， 踢佢番大陸。 而阿媽第二日也番番屋企住喇， 因為傻狗唔慣新環境咁喎。
事件暫時也算是平息了吧？ 不過只是一時的解決， 還是之後仲有手尾跟都仲係未知之數。 其實呢件事都唔係冇諗過， 遲早都會發生， 關於老豆對 S 一連串的安排， 阿媽同我哋四兄弟姊妹都從來未覺得合理過， 只不過係老豆一意孤行的結果。 其實， 就連 S 本身也是一個受害者， 雖然我從來也冇諗過同情佢咁解。
自己身處日本， 好難插手很多事， 唯有盡量同家姐阿哥傾好佢。 辛苦哂。
結果今日就整日為呢件事煩， 乜都冇心機做。 研究也好， GCOE 也好(呢個就不嬲冇心機㗎喇)。 尋日玩得咁開心， 俾呢件事破壞哂 d mood。 不過聽到阿媽冇事， 事情也算暫時解決， 也可以放心吧。