2008/8/4 (月曜日)
富士登山 その一
朝着日本的最高峰－－富士山進發。 好早就起咗身， 執好個人， 檢查一下裝備， 冇乜大問題掛？ 好好。 出發！
去到渋谷會合咗 H ちゃん先。 一路吹水一路出發去駒場国際交流会館， 去到時遲了少少咁大把啦。 不過都冇乜問題。 話時話這間会館都係嚟過一兩次， 而H ちゃん更加係第一次嚟， 所以就周圍參觀一下。 唔， 都延唔錯， 而自己亦有少少諗番起以前喺祖師谷時的生活。
坐巴士出發， 巴士除了停一個站（談合坂）之外就基本上係直上富士山的五合目。 去到五合目時有少少陰天， 正確啲講係落咗車之後開始落雨 orz... 去咗一間休息所等咗陣， 總算係可以出發的天氣。 好好， 影張靚相之後出發！ 今日目標係上到七合目的トモエ館， 出發！
由五合目到六合目， 爬咗基本上唔夠100m， 跟住在上七合目時就有少少辛苦喇。 自己應該冇乜問題， 見H ちゃん好似有少少辛苦， 所以全程就同佢一齊喇（唔唔）， 一路行亦都一路同唔同嘅人傾下計咁。 幾好。
行咗好耐終於都去到トモエ館， 唔。 路唔算太難行， 不過好鬼多怪蟲， 而且周不時又落下雨咁， 所以都有少少攰喇。 但一路上嚟一路的景色都好好（當然除咗落雨同大霧時）， 所以都好啦。
夜晚雖然帶咗唔少糧草， 不過都係想食吓呢度嘅咖喱， 特別好食？ 又唔係， 不過咁難得上到山冇理由唔試下㗎嘛。 嗰塊扒的確幾好食（唔， 其實嗰時就真係醉翁之意喇）， 食完嘢， 吹咗陣水， 九點， Hちゃん同 K君都諗住瞓覺， 因為聽日應該晨咁早會去睇日出嘛。 冇計， 嘗試一下瞓。 但結果都係失敗， 一來度迫到鬼咁（每個人的空間大約係50cm乘170cm， 兩側都有人瞓）， 二來屋頂雨水滴滴嗒嗒， 三來最重要嘅係－－九點咋！ 點瞓呀！
瞓唔着都冇計。 落咗樓下同其它瞓唔着嘅人吹水， 其中一個英國人， 傾下傾下， 發現佢原來之前去香港 (Poly) 讀過兩個月， 當佢之道我香港嚟時好鬼興奮， 傾咗都唔少時間， 由大學到功夫都講餐飽。 哈哈。 厲害。
之後唔想瞓都要試下瞓喇。 唔係聽日唔駛行都似。 好好。 早抖。 聽日繼續。