2008/9/8 (月曜日)
Alex vs 女牙醫 （被㩒住嚟打）
日抖留在屋企魔界戦記， 出街又做唔到幾多嘢， 返 lab 又可能見到巴斯光年， 諗起都冇乜心機添。 不過都係藉口多喇， 懶就懶 ....
夜晚去咗睇牙醫， 剥智慧齒喇。 上年剥咗上面兩隻， 今次下面一隻， 另一隻最後大佬唔知幾時出嚟， 去到坐底時， 牙醫姐姐就話
咁今日就會同你剥智慧牙㗎喇
一時間未有心理準備...
えっ、今日剥呀?
定係你想遲啲剥？
可唔可以講吓隻牙嘅情況先？
有唔少部份入咗牙肉， 睇怕都唔可以就咁剥喇， 應該要鋸咗上面一部份， 之後再逐步拎出嚟
聽到呢度都覺得想死， 陸續有嚟...
因為下面有一條粗神經， 同埋因為要鋸開少少骨嘅關係， 睇下腫就冇得避㗎喇， 至少呢個禮拜食嘢同埋講嘢都會有問題， 至於幾時好番就因人而異喇， 有人超過一年都未好番...
其實佢係唔係想殺咗我？！ 聽到呢度真係有啲寒....
心口突然間出咗個勇字， 呢排唔駛點返學校都得， 好多時間都唔駛點見人， 所以呢個時間剥就點都係最好喇。 死就死！ 一點頭之下就正式開始....
過程應該都要唔少時間喇， 又要鋸喎。 麻醉咗之後都好仲痛㗎， 不過痛都係其次， 一堆唔知乜嘢（當時對眼矇住乜都唔知）喺個口到郁嚟郁去喎， 食多少少嘢都隨時嘔哂出嚟。 最奇怪嘅係點解呢位女牙醫可以咁大力㗎呢？
掙札一輪之後， 聽到一句
剝咗喇
えっ……？ 剝咗乜？ 助手拎開那塊矇住自己對眼的毛巾之後， 旁邊有一隻完好無缺的大牙， 唔？
今次總算唔駛鋸骨都可以剝到隻牙， 總算冇大問題喇。 咁今晚記住....
之後一大堆注意事項， 同上年一樣嘅內容所以都冇點集中聽， 反而腦裏面仍然懷疑係唔係今日真係搞掂咗， 但見到嗰隻牙又的確拎咗出嚟...
う……ん
まあ、いいか
結果返到屋企都係啫喱套餐， 麻醉過咗之後有啲痛， 加上個口裏面可以當膠水嘅口水， 好唔舒服， 早啲瞓.... 但都係瞓唔着， 起身， 兩點半... 平時呢個時間都未瞓喇。 呀， 唔理咁多， 食粒止痛藥當安眠藥喇。