2009/1/31 (土曜日)
羽毛球日。 本來今日其實有 B4 嘅學生嘅 presentation， 不過， 唔， 聽唔聽都係咁， 無謂浪費自己時間喇。 有時間去打吓波仲好吖嘛。 不過今日可能冇食飯， 所以真係完全冇力打波囉。
Anyway 去吹水， 唔知點解講到鍾意邊類型女仔嘅問題， 唔， 唔， 要答其實限定咗一個答案喇， 不過反正講都唔明， 如果以有名人嚟講就係眞鍋かをり， 又或者係水樹奈々喇， 尤其最近成日都聽奈々ちゃん嘅歌同埋睇佢個 blog 囉。
之後去咗同朋友 P ちゃん食飯， 都真係唔知係點解會同呢個人可以傾到五個鍾頭計囉。 點講好呢， 好多時同冇戀愛感覺嘅異性都可以傾好耐計， 而且好多時都唔知點解會傾到幾深入嘅問題（但又唔係話識咗好耐㗎喎）。 真係奇怪。 有戀愛感覺嘅話， 真係好多時唔知由邊到講起好， 無限嘅 dead air， 可能真係太在意講錯嘢同埋有少少收埋自己喇。 唔。 呢方面真係要檢討一吓自己先得。