2009/2/4 (水曜日)
都有諗過吓究竟唔係咁多時間， 去唔去返學校好呢？ 最後都係打消咗呢個念頭喇。 反正都唔會有太多心機做嘢。
呢排返香港都唔多買手信喇。 鬼咁多嘢拎， 廢鬼時啦。 不過反而今次老媽子落 order， 唔拎好似又唔係幾好咁。 唔。 有少少無奈。 結果出一出去買， 順手食飯， 但係最後乜手信都冇買到， 反而搵到個銀包（想搵好鬼耐喇， 不過睇極都睇唔啱， 一係就太貴）。
夜晚由 YCAT 出發去羽田機場， 個國際線真係好鬼近， 五點幾出門口都鬼咁多時間剩。 去到機場， 要再坐程 shuttle bus 去國際線， 去到， 真係懷疑自己係唔係去錯地方， 不過一落車就聽到大大聲嘅廣東話， 就知道自己冇去錯地方啦。
去到， 成班東瀛遊， 有老有少， 一車二車特產， 唔， 唔。 好多人， 唔知幾時先輪到自己 check in， 應該話 check in 其實都好快搞掂， 不過件行李唔知幾時先放得入去。 而且尤其係啲師奶阿伯， 講嘢鬼咁大聲... 唉
唔理咁多， 自己做自己嘢， 上到機， 隔離坐咗位爸爸， 唔， 冇乜特別亦都冇嘢好講。 自己睇咗套戲, Vicky Christina Barcelona ， 正常都唔會揀呢套戲， 不過咁啱之前朋友講開所以睇吓。 唔。 一般啦....
返到香港， 早咗少少， 趕得切架屯門車， 最初都唔知邊度落車好， 諗住近近哋去市中心坐的士， 點知突然話豐景園有得落， 於是行都行到返屋企。
十多日香港生活。 唔。 好好休息一吓先得。