2009/2/14 (土曜日)
總括嚟講好多事發生嘅一日。 結論嚟講， 要做嘅嘢做咗， 不過唔係開心嘅一日囉。 點都好， 都要接受現實。
飲完茶， 下晝去到尖沙咀會合 H ちゃん同埋 A ちゃん， 去咗美麗華嗰邊試呢個蕃茄麵， 佢哋兩個都覺得幾好食喇。 不過呢個店員真係嘢都唔講多句， 完全冇反應， 唔。 唔理得咁多喇。
之後行去碼頭嗰邊， 中途見到買嘢中嘅 K ちゃん(1)， 真係幾邪門囉。 唔， 唔理咁多， 繼續去行咗陣， 坐低飲嘢之後會合咗家姐， 佢哋兩個係都話要多謝佢張八達通喎。 真係， 唔駛咁着緊嘛。
之後去咗旺角嗰邊， 陪家姐姐夫行咗陣食少少嘢， 去到旺角， 又見到 K ちゃん(2)， 仲買緊嘢... 真係邪到鬼咁。 後來無謂阻住佢哋二人世界啦。 之後本來諗住去尖沙咀再坐船過銅鑼灣， 不過中途撞到 K ちゃん(3)， 第三次喇， 真係奇蹟。 雖然今次明知佢會去信和嗰邊所以撞得到... 但係真係估唔到囉。
結果， 三個人去食情人節餐（？）， 奇奇怪怪， 某程度自己有少少做咗玩具咁。 唔緊要啦。 呢個時間唔係同佢哋一齊嘅話其實真係得個等字， 係咁唔知點咁。 呢個時間有朋友喺身邊真係一種福氣喇。
最後自己一個人去咗銅鑼灣， 等， 都係等唔到， 去到都第二日， 打咗個電話， 結果就經呢個電話講咗要講嘅嘢， 而結論嚟講， 唔係自己想聽嘅答案， 不過係自己預料之內囉。 其實有幾個人都同我提過呢個結果㗎喇， 自己心裏面都知。 不過有啲嘢真係唔講唔得...
心情頗為複雜。 不過都接受到嘅。