2009/2/15 (日曜日)
鬼咁夜先瞓， 不過又晨咁早起身， 始終有啲反常喇。 不過都仲撑得住嘅。
朝早乜都冇理。 瞓多咗陣， 廢時諗太多嘢嘛。 差唔多時間， 去到元朗會合朋友， 燒嘢食也。 不過自己真係有啲反常喇。 天色唔係幾對路， 朋友問個 staff 如果落雨點， 個 staff 話
我睇今日應該唔會落雨
跟住無名火起， 即刻駁咗句
而家唔係問你會唔會落雨， 係問你落雨點
講完之後自己都嚇咗一跳， 咁鬼寸都得， 自己都忍受唔到囉。 但係都未夠， 呢啲場地總會有個人賣啤酒， 第一次算， 第二次呢個阿嬸唔記得自己嚟過， 我都唔知點解開口話
你問第二次㗎喇
駛唔駛咁寸呀？？？ 我都真係... 不過一個真係問非所答， 一個真係煩咗少少嘅， 算啦。
之後整體燒嘢食氣氛都算係唔錯喇， 雖然自己其實有唔少時間去咗遊魂， 唔知佢哋有冇發現喇... 都未至於好嚴重， OK 啩？
之後再去飲嘢。 咁又一日喇。 留喺香港嘅日子， 咁又剩低少少...