2009/5/15 (金曜日)
尋日其實開始有啲傷風， 今日好似嚴重咗咁， 不過點都要返學校喇， 有好多嘢都未做， 同埋今日有朋友嘅 PhD defense， 咁緊係唔去都唔得㗎啦。
返到學校， 係咁寫 program， 唔， 其實都係寫咗少少， 因為今日唔記得咗準備夜晚嘅廣東話班。 之前都有諗過吓放棄唔教， 不過諗吓諗吓， 都係教多一排睇吓情形點先啦。
朋友嘅 PhD defense， 其實同佢講嘅內容都係一知半解， 不過可以講嘅係， 其它教授都唔算 challenge 都好勁， 當然佢做出嚟嘅 result 好啦。 總之順順利利過咗一大個難關， 之後嘅事就之後先算咯。
夜晚嘅廣東話班， 有一位好耐都冇見過嘅同學， 正確嚟講佢都係嚟過一次咁大把。 講真連佢個樣係點都冇乜印象喇。 不過今日見番都總算認得嘅。
不過上堂同埋做 research 最大嘅分別， 就係上堂自己要不斷咁講嘢喇。 講足兩個鐘， 個喉朧都係頂唔住， 話時話以前都好似試過類似嘅事...
食完飯之後本來都想去飲吓嘢先返屋企， 不過都係頂唔順， 早啲返去抖好啲喇。 咦？ 不過夜晚有想睇嘅電視， 唔可以咁早瞓...