2009/5/30 (土曜日)
尋晚鬼咁夜返屋企， 都未做份 GCOE 嘅 presentation， 撞鬼， 朝早起身係咁做， 本來有啲唔想去打羽毛球（好多人甩底）， 不過都係快快手手趕起份 presentation 走去。
結果得四個人打， 攰到飛起。 不過都好嘅。 尤其係當個對手可以令自己進入忘我境界嘛， 運動呢家嘢， 自己一個做嘅話冇乜耐力就唔想郁， 不過有對手嘅話就算攰都會郁到嘛。
照慣例去食嘢吹水之後， 去渋谷會合一個新朋友， 唔， 正確嚟講係 Pちゃん嘅朋友喇， 電腦壞鬼咗， 問有冇人幫到手， 結果唔知點解就俾人介紹咗（講明在先， 我唔識用 Vista）， 見到呢位新朋友之後， 竟然發現另一個朋友 Wちゃん都介紹咗自己去幫佢手， 問題係我諗 Pちゃん同 Wちゃん應該係唔識㗎囉。 點會同時介紹我俾呢個人識㗎呢？ 雖然又冇乜所謂， 不過真係估你唔到囉。
搵個地方坐底， check 吓部機， 唔， Windows 都開唔到， 不過有啲奇怪， reboot 之後嘅反應同平時唔同， 要完全斷電一段時間先再可以 boot 到部機。 奇怪， 唔似 OS 死嘅問題囉， 好大機會死 hardware， 但係之前冇諗到， 所以冇“架餐”喇， 冇計， 去ビッグカメラ買鑼絲批， 跟住開棺... 呀唔係， 開蓋， 好在有兩條 RAM， 拆一條出嚟， 唔得死機， 換另一條入去， 唔， 正常開到機喇。 不過好鬼慢， 果然係 Vista， 1G 真係用唔到。
之後睇吓附近買唔買到 RAM， 有就有， 不過成萬二円一條， 搵鬼買， kakaku.com check 都係三千樓下。 冇計， 好在呢位朋友都識少少電腦嘢， 某個程度之後可以自己搞掂啩？
唔理， 去食飯， 本來佢話可以食佢餐勁嘅， 不過唔係太好， 結果去咗大戶屋， 其實大戶屋真係幾唔錯， 平靚正， 最重要係禁煙， 喺日本要搵一間完全禁煙嘅舖頭唔係咁易哎嘛。