2009/8/22（土曜日）
日の出南小学校で交流会
尋晚冇酒店住， 各自返屋企， 所以今日要晨咁早出門口， 好在横浜真係幾方便， 坐兩程車就去得到海浜幕張， 去到車站 join 咗 C 君之後去到酒店， 算係差唔多 ready 好， 不過都係見到佢哋嘈到隻鬼咁。 等睇戲。
今日去到浦安嘅一間小學， 演奏交流會， 前兩日對方嘅老師都嚟過傾啲細節嘢， 而香港呢邊就真係剩係識用“執生”嚟掩飾自己唔想做嘢嘅一面。 anyway 今日基本上兩個導遊都剩係識負責上車落車， 另外兩個旅行社嘅 staff 去咗其它地方（之前佢都俾間學校玩死喇， 放過佢哋俾佢哋去玩啦）， 結果自己同 C 君真係要主持大局咁濟， 明明最初話我哋幫吓手就得㗎？ 不過有時睇人幫手啦， 旅行社嗰邊對自己同 C 君都算係唔錯， 幫多少少手都唔駛死嘅。
一落車就真係踢哂腳， 好多 coordination 要做， 冇計， 可以溝通嘅真係唔多人， anyway 整咗好耐入到 hall 之後， 差唔多可以開始， 話時話， 自己幫手喺呢個 function 做傳譯， 其實某程度嚟講自己係做咗司儀咁濟囉。 真係企咗出去講嘛。 最大件事係有間 local 嘅電視台嚟採訪， 即係好大機會自己已經上咗電視， 唔， 其實都冇乜所謂嘅。
之後嘅 performance 時間上有啲延遲， 不過算係比自己預計嘅好喇。 日本呢邊嘅小學生樂器唔算係非常之專業， 不過見佢哋表演時除咗樂器之外， 笑容動作同埋一啲舞蹈等都令到個 overall 感覺好好。 而香港呢邊， 樂器方面真係做得幾好， 不過就真係冇厘生氣囉。
自己呢， 之前日本小學生要講嘅嘢其實都話咗俾我聽， 所以準備都唔係一個問題， 不過香港呢邊本來剩係諗住用英文講， 見到呢邊有中文有日本語， 臨時臨急要自己幫手譯， 真係撞佢個鬼。 玩嘢咩， 雖然以佢哋一向嘅做法， 都唔係估唔到... 仲要用埋啲扮深嘅英文， 好多字明明可以用好簡單嘅字嚟講， 偏偏就要用埋啲複雜字， 化繁為簡， 冇時間準備之下都係譯到幾多得幾多， 唔鬼理佢哋咁多喇。
之後兩邊做一個大合奏， 練習時做咗一輪嘢， 好多鎖事都唔記得咁多喇， anyway 之後開始時剩係見到觀眾席有好多人企咗喺度， 全部都係香港嗰班人拎住相機 video cam 喺度阻住個地球轉， 撞鬼， 即管試吓叫個肥佬 stop 佢哋
唔理得咁多， 就算講都冇用， 佢哋都唔會聽
其實都唔係唔贊成佢呢個 point， 不過你身為教師連試都唔試， 平時對住班小學生就聲大夾惡， 起碼去有禮貌講聲都好吖？ 跟團過嚟做乜呀？
anyway 完咗個合奏之後就有啲時間俾佢哋影相， 自己呢個時間都可以鬆少少， 其實香港間小學今日算係比我想像中小出醜㗎喇（雖然都唔少問題）， 總體嚟講都算係成功啦。 但點都係好明顯睇到， 日本小學嗰邊就真係尊重我同 C 君多過香港嗰邊囉。 學陶傑話齋， DNA 真係唔同㗎囉。
之後去到浅草， 食少少嘢之後其實就可以解散， 唔？ 咁快手？ 都好， 自己都自問盡咗力做好旅行社要求嘅嘢喇。 結果同旅行社個 staff 同埋 C 君飲少少嘢之後走人。 同 C 君去咗渋谷買羽毛球拍， 同埋傾吓羽毛球同埋今日嘅種種問題咁。 唔。 聽日仲有一日要對住班麻煩人...