2009/8/28（金曜日）
又再一次接 tour guide 嘅 part time， 上次嗰個 tour 真係有啲想死嘅感覺， 今次香港嗰邊 S さん話應該會好啲喎。 其實真係唔見過都唔知。
Anyway 今次自己一個晨咁早去到ヤマハ埼玉工場， 其實好耐以前因為另一份 part time interview 所以都嚟過一次埼玉， 不過之後真係應該都冇嚟過喇。 比起横浜或者東京其實真係感覺地方大好多， 話唔定自己其實鍾意呢類地方多啲都唔定。 不過又唔捨得横浜嘅夜景喎... 唔.....
去到等咗一陣就見到班人， 今次團人全車男仔（除咗隨隊兩位老師）同埋冇家長， 人數亦都自然少好多， 感覺上都比較容易控制啩？ 唔理得咁多， 入到去同幾個 staff 打聲招咪之後就入去 briefing room， 基本上由一位 staff present， 自己就即時傳譯， 其實日本語去廣東話嘅傳譯自己唔係太大問題， 最慘係啲樂器名好多時真係唔知點譯， 都好在佢都有少少就住自己， 咁都冇咁大問題。
present 完之後就去參觀工場， 自己冇接觸啲樂器， 其實都係睇到一頭煙， 不過睇啲嘢由一塊塊金屬片變成一件樂器， 望住嗰個過程涉及幾多人手， 終於都開始明白點解一件樂器可以賣到咁鬼貴。 尤其有啲係人手做嘅， 冇咁上下 skill 一件件同你磨都唔得。 anyway 其實就一路參觀一路傳譯， 嗰位 staff 第一次夾（正確啲講係第一次見）， 都算夾得幾好咁啦， 今次自己都算係滿意自己嘅表現喇。
之後隨團去到東京タワー食飯， 話就話食飯， 不過趕到鬼咁。 又要打電話 contact 之後間舖頭， 個電話仲係錯嘅。 整鬼。 搵咗一輪先搵到， 都冇計。 anyway 食完之後即刻出發， 呢班學生都算係聽話嘅， 雖然都磨咗陣先可以出發， 都預咗喇。
去到銀座嘅ヤマハ， 因為係臨時店所以都比較窄， 四十幾五十人入到嚟， anyway 等佢哋慢慢 shopping， 好似話有好多嘢香港都冇得賣喎， へぇ…， 樂器嘅嘢真係冇嘢可以講。 不過因為可以退稅， 所以俾錢時自己都有機會出場嘅。 但係每人買啲濕碎嘢湊夠一萬円以上嚟退稅， 但係又要分開逐個人俾錢喎， 嗰邊個 staff 都真係唔知點好。 本身其實已經俾咗 discount 㗎喇， 同埋每人買少少濕碎嘢就唔鬼好退稅啦心諗， 不過我都知十元都係錢嚟嘅。
去完ヤマハ再去山野， 都係樂器嘢， 始終都好多重覆嘅關係所以好多學生都冇理到， 自己周圍走喇， 後來咪俾個阿 sir 鬧到飛起囉， 其實自己都同兩個仔走咗去買嘢飲， 不過有我陪住兩個仔都算冇事喇。
之後又去到台場， 平時好日都唔嚟一次， 呢兩個禮拜嚟咗三次， 計埋之前傳譯 part time 又多一之， 再下個禮拜又嚟， 真係唔知自己發生乜嘢事。 點都好， 會合 S さん之後去咗台場小香港食飯， 真係諗唔明， 成大班人又香港嚟日本旅行， 點會安排佢哋去食香港嘢㗎？ 真係諗唔明囉。 唔理咁多， 自己應該係成團人裏面最開心嗰個囉。 平時有幾可有叉燒食先得㗎？ 哈哈。
overall 幾長嘅一日， 不過都好過之前小學班人喇。 仲有兩日同佢哋玩， 都應該冇問題嘅。