2009/10/31（土曜日）
木月小学校ふれあいフェスティバル
晨咁早起身， 唔係 part time， 不過都唔係冇關喇， 木月小学校嘅ふれあいフェスティバル每年都有參加， 今年都唔例外。 參加唔係問題， 不過要晨咁早起身真係有啲難度。
anyway 遲咗啲啲， 但都總算趕得切開場囉。 今次同往年唔同嘅係唔知點解個開場式走咗出外面， 其實裏面定外面唔係咁大問題嘅。 不過外面嘅話啲聲聽得唔係咁清楚囉， 但係反而感覺上比較 open， 所以都算唔錯啦。
今年自己負責嘅， 亦同每年一樣， 「多文化体験コーナー」， 基本上係一啲喺英語活動時玩過嘅 game plus alpha 咁上下啦？ 小朋友基本上會 lead 個 process， 自己同另一個留學生就喺附近幫吓手咁， 睇住啲學生玩其實都幾開心喇， 啲細路有時又真係好鬼好笑嘛。
Anyway 完咗之後同個新校長吹咗陣水之後就去打羽毛球， 遲咗少少到， 都冇所謂啦。 今次又有新 member （其實都唔係新， 不過上次冇到）， 話時話最近嘅 member 可能 level 差唔多， 玩起上嚟個節奏感都好咗好多！
食埋嘢之後返屋企繼續 TOV ...
2009/10/30（金曜日）
撞鬼， 咁快又到月尾。 唔， 好多嘢都未做好， 編論文到而家都仲未寫好， 個 simulation results 仲未齊哂， 而且其中一啲 results 有啲怪怪哋嘅感覺， 唯有小心啲 check 啦。
simulation results 未出， 都冇計， 開始新嘅 simulator 嘅 task 先算， 以前都用過嘅 simulator， 不過新嘅 API call 未用過， 同埋以前冇 IDE 囉。 不過話時話用 IDE 好啲定係用返用開嘅 vim 好啲， 到而家仲係言之尚早， anyway 慣咗個 environment 先講， 唔係嘅話乜都唔駛開始。
不過做得一陣又夠鐘閃人喇， 事關約咗兩個香港朋友去台場喇。 其中一個朋友 Y さん就前幾個月先見過， 另一個 A さん， 認真諗吓應該有成十年以上冇見過喇， 冇計啦， 中五畢業之後已經冇聯絡， 而且之後仲去咗美國， 叫做喺 Facebook add 咗嘅， 不過自己嘅 Facebook 基本上完全放置プレイ， 所以都真係冇聯絡喇。
去到， 等咗一陣（一陣 ＝ 30分鐘）， 咦？ 三個人？ 其中一個原來係 Y さん嘅同事， 今次三人行喇， 佢哋嚟到， 結論就不過係佢哋已經行到腳軟， 想搵個地方坐底食飯。 於是去咗附近嘅一間燒肉店， 叫咗一個 family set （都唔知邊度 family 囉）， 慢慢食， 間舖頭有度好， 就係個海景夠靚， 仲有今日算係少人啦， 所以都悠悠閒閒咁坐， 同埋個廚師唔知點解都好得閒囉。 可以同其中一枱人吹水吹廿幾分鐘...
難得嚟到緊係要影吓夜景啦。 不過影開相嘅人要求果然高啲， 影咗好耐都唔滿意， 冇計喎？ 要挑戰人類極限， 三秒唔手震就真係有鬼啦！ 最後靈機一觸， 搵到個靚位放機， 先至叫到影到咋， 不過呢， 真係要 Y さん認真學清楚部機啲 settings 點用囉。
之後返屋企， 死咗喺到咁濟， 聽日又要早起身 orz...
2009/10/29（木曜日）
朝早去區役所， update 張登錄證， 話時話都唔知幾耐冇去過區役所， 有少少唔認得條路， 不過而家想當失路其實都唔係一件容易嘅事喇， 尤其尋日部 Android 啱啱先 power up 咗， 嘻嘻。
區役所嘅雜務完咗之後返學校，不過都差唔多 lunch time 喇， 結果喺 lab 度都係乜都冇做過。 食飽飽， 返 ITC part time， 和和平平嘅一日， 不過就係眼瞓， 點都好， set 好個 notebook 嘅 OMNet++ 先算。 之前梗係有俥吥明嘅 error， 諗唔通， 都冇計， 試試試， 原來係 XULrunner 嘅問題， 真係諗唔到原來個 Eclipse （個 OMNet++ IDE 係 base on Eclipse）同個新嘅 XULrunner 夾唔埋囉。
話時話啱啱先 update 咗 Android 1.6， 就聽到 Android 2.0 嘅 update 喇。 今次個 update 好似好勁咁， 唔知幾時先有得 update 呢？
2009/10/28（水曜日）
今朝唔知發生乜嘢事， 5:30am 起咗身， 反正今日都要早起身， 再瞓過都嘥氣。 望望個電話...
好耐冇去過嘅木月小学校， 今年負責三四年級總共四班， 大部人自己之前都教過， 所以都好容易融入喇。 反而四班入面兩個教師就真係未見過面， 未夾過突然就開始夾， 有少少甩碌咁。 同埋其中一班唔知點解特別多搞事嘅學生， 有啲難度...
有時間同啲小朋友吹水， 俾佢哋問咗好多問題， 出身地， 年齡， 仲有結咗婚未等等， 老老實實答， 點知其中一個四年級嘅女仔話
早啲結婚好啲呀！
orz... 冇諗到會有句咁嘅嘢走出嚟... 唔...
返返學校， 繼續 simulation， 新開始嘅 simulation program 唔知點解新 notebook 行唔到... 有鬼？
話時話新嘅 Android 1.6， 感覺上比起 1.5 有唔少進步， 或者叫做 2.0 嘅話仲差啲機能上嘅嘢， 不過肯定唔係一個 minor upgrade 囉。 Youtube 同埋 Android Market UI 都好咗唔少， performance 感覺上都快咗好多（可能係 memory management 好咗？）， 而地圖亦都比起之前易用， 起碼終於可以 check 電車時間表喇！
2009/10/27（火曜日）
研究室 meeting， 冇乜特別， 都係 M1 嘅研究進度， 呢頭聽完嗰頭就唔記得。 之後有時間同笹瀬先生吹咗陣水， 呀， 其實都唔係一陣喇， 講閒話時嘅笹瀬先生果然可以滔滔不絶咁講， 都唔到自己唔寫個服字。 感覺上， 笹瀬先生好似最近唔太常同研究室嘅其它學生吹水咁， 唔， 本身好多學生跟本學都唔返喇。
題外話， 我嘅第一個 homepage 係喺十幾年前用 56k modem 嗰時已經 host 咗， 當時連乜嘢係 HTML 都完全唔知， 真係估唔到自己會有一段時間會食呢行飯囉。 而當時嘅 homepage host 喺 geocities， 而今日 geocities 亦都正式摺埋喇... 感慨良多... 而當時嘅第一個 email address 係 hotmail 嘅 address， 俾 Microsoft 收購咗， 今時今日都仲好多人用， 但係就連 Microsoft 都續漸用 live.com 去取代 hotmail.com， 上一代嘅 internet 嘅名詞 （geocities, netscape navigator, infoseek 等等）， 今時今日仲有幾多人知道呢幾個名詞呢？
2009/10/26（月曜日）
返學校做嘢， setup 個新嘅 OMNet++ 準備之後嘅 simulation， 仲有其它雜務等等。 不過嘛， 四點又要去 GCOE lecture， 都真係唔好諗住可以做到幾多嘢。
今日兩個 speakers， 第一個竟然用英文講關於通信嘅 topic， 自然 P3 RA 做樣都要問問題啦。 另外一個講啲嘢都真係悶到抽筋， 完全冇聽到。
第一次試用個飯煲嘅預較煲飯（？）， 都幾好， 返到屋企即刻有飯食， 煮出嚟嘅飯都唔太大問題。 跟住唔覺意整咗個白菜煲出嚟， 夠哂纖維喇！
夜晚繼續 TOV， 話時話十月尾， 仲有台風走嚟... 總之唔好影響到聽日就得。
2009/10/24（土曜日）
IEEE GOLD General Meeting
要晨咁早起身， 真係唔慣囉。 之前喺池谷又係咁， 但係 anyway 自己有重要事要早起身嘅話總會冇問題啩？ 最多都係成日釣魚咁。
去到東京都市大学， meet 返個 GOLD 嘅 exco， 做少少雜務之後就見到 IEEE 嘅 President Dr John Vig， 今次以 GOLD member 嘅身份出席個 talk 喇。 基本上都係講吓最近 IEEE 會員等等等問題， 但就幾質疑在座嘅人當中有幾多個聽得明。
Dr John Vig 講完， 輪到聽各大学嘅 student branch 嘅活動報告， 唔， 冇嘢好聽， 基本上都真係眼瞓到死。 冇計... 最慘嘅係個 report 拖長咗成粒鐘， 專程嚟到嘅 Madu 都要喺度等。 話時話都市大嘅飯堂， 嘢食都算係過得去啦， 不過可唔可以多少少選擇呢？ 学食平就平過出面少少， 不過質素高番少少都得啩？
下晝終於到正場 GOLD general meeting， 都係一啲報告同埋之後嘅檢討等等。 因為之前個 student branches report 太長， 所以連帶個 general meeting 都少咗時間， 結果想分組討論都唔得。
一開完會， 出事。 雨男嘅實力突然發揮， 無端端落雨， 果然自己去襯一啲未去過嘅地方時真係要好好準備先得。 冇計， 去附近嘅便利店買咗把爛鬼遮， 成 400 円， 都唔明點解呢把爛遮咁鬼貴囉。 不過都要買喇。 去到懇親会嘅居酒屋， 其實真係唔太鍾意個環境， 好鬼臭... 自己 group 人裏面冇煙鏟， 但係都真係臭到缺氧囉... 加上本身眼瞓， 結果成兩個鐘到傻吓傻吓咁... 想死 orz...
2009/10/23（金曜日）
乖乖地返學校做嘢， 不過做得一陣， 又走咗去睇 domain 嘅嘢， 呢個 website 基本上都可以搬去新嘅 domain (http://www.opalex.net)喇。
話時話點解用 "opalex" 呢？ 其實本來想 register "openalex"， 不過俾人 reg 鬼咗。 退而求其次就用咗而家嘅 opalex 喇。 "open" 自然解呢度好多嘢都係公開， 冇限制喇， 本身呢個 blog 嘅嘢寫得出嚟都係俾人睇， 而另外就係自己一向都對 open source 嘅嘢有興趣嘛（Linux, Firefox, Openoffice, Android etc etc）， 所以 "open" 都好可以用嚟形容自己嘅興趣等等。 而後可以用呢個 URL 嚟 access 呢個 blog 喇。
2009/10/22（木曜日）
返到去學校見到尋日開火嘅 O 君突然上咗七樓， 唔， 佢一直都話想上七樓㗎喇。 不過就係冇諗過今日會上嚟囉。 不過唔上尤至可， 一上就係咁吹水， 尋日件事都想問吓佢點諗嘛。 結果早返嚟少少， 都係乜嘢都冇做過...
之後 ITC， 都可以算係悠悠閒閒咁。 呢期嘅同事都叫慣咗， 所以返呢個 job 都開始多嘢講喇。 アルバイト果然唔錯。
返屋企前， 同 O 君行咗過綱島嗰邊， 自己其實就去邊都冇乜所謂喇。 總之搵個地方醫肚先算。 食飽飽～！
今日零時 Docomo 終於都放 Android 1.6 updates， 過多一陣就有新（少少）嘅 OS 玩喇。 唔知可唔可以 root 到呢？
2009/10/21（水曜日）
晨咁早返學校開 GCOE meeting， 不過唔知點解其它人仲早， 雖然自己都算係準時...
首先先後兩個 RA present， 第一個都冇乜嘢， 笹瀬先生係咁易問咗幾條問題就放人， 另一個 RA， O 君 challenge 咗少少問題， 唔知點解在座嘅 S 先生（另一個 RA 嘅 supervisor）突然搶答， 本來理論 research 嘅 contents 無可厚非， 但係...
好鬼重火藥味囉！！
後來綜合番， 諗吓諗吓， 可能係教授之間嘅種種恩怨， 自己嘅處境， 原來幾和平吓。 不過有幾多恩怨其實都算， 冇理由帶埋呢啲恩怨入嚟 meeting 嘛？ 糾纏咗一陣， 最後 O 君都唔再問落去， 最後 S 先生對住自己個學生補咗句
你答得真係好差， 應該係你去解答呢個問題
嘩... 唔駛玩到咁激嘛？
之後可能俾人傳染， 自己都重咗幾錢火藥。 Y 先生提到星期一嘅 lecture， 冇乜人問問題， 自己本來都唔想講， 即刻就反駁
啲 guest speakers 全部用日本語 present 埋啲佢哋自己先知嘅 content， 對於呢度過半嘅人嚟講， lecture 只不過係 “a waste of time”
Y 先生嘅反應真係一如預期咁失望。 呢啲嘢控制唔到， 試吓叫啲 guest speaker 用英文 slide 云云。 最後補咗句 “I am sorry”， 結果問題都係冇解決到。 不過 Y 先生都不過係夾心， 無謂再咄咄逼人喇。
之後自己都真係有少少 out of control。 起碼同平時唔同囉。 唔...
開完會同 Madu 同埋 P 君去吹咗陣水， 食埋飯， 返去 lab 做雜務， 剩係 email 都差唔多用咗自己成個鐘， research 嘢都不過係做咗少少咁大把... 結果今日嘅時間基本上都係浪費喇...
2009/10/20（火曜日）
尋日玩咗成晚， 朝早又遲起身， 哈哈， 冇計啦。 不過今日都真係冇乜重要嘢， 返到學校就係研究室 meeting， 本來諗住四個 B4 應該好快就完啦， 點知中途殺咗個 M 君出嚟， 仲要講講吓中途先發現用錯 slide， 真係唔明佢搞乜鬼。 不過搞錯都冇計啦。 之後， 突然又殺咗個笹瀬先生出嚟 present 佢過兩日 IEEE invited speech 嘅嘢， 其實個 present 真係有啲諗唔明。 不過之後同平時有啲唔同， 講講吓叫我哋想像吓未來嘅 technology 會係點樣， 唔， 其實都幾有趣嘅一個題目喇， technology 諗太多可能都用唔着， 反而諗吓點 apply 有時會仲好玩， apply 唔到再諗點樣用 technology 去解決， 都未嘗唔係一個方向喇！
跟住都係返上 lab 到做自己嘢， 唔， 繼續 run 個 simulation， 之前個 result 都唔係太差， 可以寫吓嘅， 自己就覺得個 result 都算係理所當然， 意料之內， 所以都係搵水嚟吹喇。 唔， 不過自己真係份 paper 短咗少少， 點都要加返長少少嘅...
2009/10/19（月曜日）
Surprise Day!
今日成日都係啲細節嘢， 搞到都冇乜時間做嘢，鬼叫尋日顧住打機咩... orz... 朝早做好啲私事， 食 lunch 時唔知點解， 一出 campus 見到 GCOE 三位 staff （心裏面有好多嘢想講但係就永遠講唔出口囉）， 之後去到東急ストア時唔知點解咁好彩撞見笹瀬先生（呢個世界都唔好話唔奇）
下晝做咗一陣嘢之後去木月小学校， 傾少少今年嘅英語活動嘅細節， 同埋一位新人一齊去， 美籍日本人， 唔， 雖然係日本人不過啲日本語竟然仲差過我（笑）， 冇計啦。 喺夏威夷土生土長， 冇機會都唔方會講日本語喇。 不過總覺得怪怪地咁囉？
之後即刻又上 GCOE lecture， 理所當然冇聽到個 lecture， 雖然 Fujifilm 嘅 guest lecture 都有啲想知發生乜嘢事， 不過講嘅 topic 又真係冇乜興趣聽...
未完個 lecture （正確嚟講過咗時間喇， 有班人唔通氣係咁問問題咋）就鬆人， 講住去品川 join 上兩個禮拜池谷之友。 今次完全俾佢哋裝哂彈弓...
今次呢個 Re－U 基本上由自己做幹事， 時間地點基本上都係自己決定， 今次揀咗去品川嘅 Outback， 品川其實只係貪佢交通方便， 冇其它原因， anyway 今日七個人裏面首先四個人集合之後就入咗舖頭， 有幾個人會遲嚟所以都係叫咗嘢， 食住等。 呢一班整體上都係第二次見（有幾個人除外）， 不過唔知點解感覺好 close 囉， 以第二次見嚟講真係幾出奇。
一路食一路傾， 講吓講吓都總算齊人。 食唔算話食咗好多嘢， 不過女仕比較多嘅情況下都唔係唔可以理解喇。 Outback 嘅其中一個特點係好多人鍾意喺度慶祝生日， 每次嚟都總有幾枱人唱生日歌喇。 Anyway 食到咁上下， 侍應又開始“Happy birthday”， 慣咗呢種氣氛， 最初都冇理到， 不過個侍應竟然走咗埋自己張枱到， “咦？ 邊個生日？”， 跟住望住個蛋糕...
えっ？等等等等等， 今日間舖頭又係自己揀， 呢班人點樣預備㗎？ 完全諗你哋唔到！ 完住進入 panic 狀態。 發生乜嘢事真係過咗幾秒先搞清楚！ 而家諗返轉頭其實都唔係冇跡可尋， 之前都有人問過我地點同埋預約等等， 但講真真係諗唔到囉！ 話哂都過咗成四日， 邊諗到會有咁大個時間差先得㗎！ anyway， 真係真係好感謝！ 仲以為今年生日冇人理... 哈哈。
之後又係不斷咁吹水， 話咁快就坐到差唔多十二點， 如果唔係趕尾班車嘅話可能會再坐耐啲都唔定... 真係完全出乎自己意料之外...
今日嘅相。 估唔到 M ちゃん可以影到咁多張相...
話時話題外話， Docomo 就嚟會 push Android 1.6 即係 Donut 嘅 update。 期待！
2009/10/18（日曜日）
成日留喺屋企， 話時話好似都有一段時間冇開過部 PS3 喇。 今日唔理咁多， 玩埋 TOV 嘅幾個 sub event， 而期中最緊要嘅都係個魔装具 event， 有幾個要去到冇雷公咁遠先攞得到， 冇辦法， 其實有啲 sub event 唔玩都冇乜所謂住， 反正都會玩第二次， 到時先慢慢 pick up 返都未遲。
另外之前睇攻略都唔係好明嘅「リタ タイダル祭り」、通称「全自動洗濯機」（唔明嘅人就由佢唔明啦！）， 之前都唔係好明個方法， 今日總算明白喇個要訣喇！ 好好， 進入二周目之前儲夠 GP 先！
2009/10/17（土曜日）
羽毛球日。 朝早去還尋日租嘅 CD， 去到舖頭， 個店員一路咁 check 啲 CD， 去到最後嗰隻... 雙 CD 嘅 classic， 唔知點解剩得一隻（いやいや、自己發傻唔記得咗咋嘛）。 冇計， 下次再還。 呀， 發傻都有個限度吖嘛。
打波， 話時話， 上次新叫去嘅朋友 M 君， 唔知點解好容易融入咗個 group 裏面， 尤其係同埋 C 君啲傻嘢完全冇違和感囉？ 哈哈， 幾有趣。
返到横浜駅唔知點解開始落雨， 冇計， 好在唔係太大雨， 行行吓...
2009/10/16（金曜日）
一個禮拜唔知點解咁鬼快完， 唔經唔覺又到咗禮拜五， 個個禮拜五都會問嘅同一個問題：呢個禮拜仗啼鷺麛嘢呢？
唔理， 點都叫仲有一日， 快快手手改咗啲 program code 等個 simulation 可以慢慢 run 先得， 搞掂之後可以（暫時）鬆一口氣。
之後， 好耐冇去過ツタヤ租 CD， 有幾隻 CD 想聽但係又唔想買喇。 一買嘅話唔知堆幾多 CD 喺屋企囉。
不過都真係意外收獲， 隻ハヤテ選曲， 基本上係一啲以前嘅歌再由ハヤテ裏面嘅角色番唱， 有啲歌真係聽返先覺得真係名曲嚟囉。
2009/10/15（木曜日）
誕生日
戦利品：
生徒会の一存 １
由出世到而家， 圍住太陽轉咗廿九個圈...
始終生日有時都想放鬆自己去玩吓， 不過今日撞正要返 part time 同埋好多雜務要處理， 結果就咁返學， part time， 做嘢， 返屋企。 乜嘢特別嘢都冇做過。
其實都冇乜所謂嘅， 就算自己得閒， 其它人都冇時間同自己慶祝， 放工時都已經鬼咁夜， 食餐好少少， 當係送份好嘅禮物俾自己囉。
自己本身就係生活喺網上嘅人。 而今日都收到朋友嘅 email 或各種 message， 有心， 所謂「實際」嘅嘢其實有冇都冇乜所謂。 同埋可以聽到朋友嘅聲， 講埋一啲無關痛癢嘅事， 其實就係最大嘅幸福喇～
又一個開始， 當圍住太陽轉夠三十個圈嗰時， 究竟會變成一個點樣嘅自己呢？
2009/10/14（水曜日）
撞鬼， 今日返到學校就係顧住玩 blog 啲嘢， 睇吓有冇辦法 fix 個 XmlRpc， 一個完全唔係而家必要要做嘅嘢， 真係... 究竟自己諗緊乜都真係自己都唔知。
就咁樣成日傻更更咁過， 做到嘅， 係個 XML exception 冇走出嚟， 但係其實實際作用同以前基本上係冇變過囉。 成日就咁冇鬼咗。
話時話， 研究室個 homepage 好似又俾人 attack， 收到 admin 嘅 email， 似乎係 SQL injection... 哈哈。 連自己個 password 都走咗出嚟。 好彩喺唔同地方用唔同 password， 所以都應該冇大問題啩？
不過都係改 password 有着數...
2009/10/13（火曜日）
繼續一日嘅工作， 今日都真係唔知係忙定係唔忙， anyway 起身， 去到學校， 就收到 email 話要 meeting.. 本來諗住冇收到 mail 就唔駛 meeting 啦， 似呼都真係妄想喇。 唔駛開會？ 諗吓就好！
anyway 今日個會自己都真係完全係同睡魔死過。 雖然有一半時間係對住部 PC 做自己嘢， 另外嘅時間就真係係咁釣魚， non stop。 關於 M2 嘅進度， 基本上係完全冇聽到， 有聽到嘅， 就只有笹瀬先生好似同自己都講過嘅“論文宗教論”， anyway 唔知點解其它人都受到自己影響？ （應該就冇可能喇... ）
開完會， 返去 lab 到寫 program 先， 為求快手， 啲 code dirty 少少都唔緊要喇， 出咗結果之後先慢慢改番好啲 code 都未遲， 好過交唔到功課嘛。
夜晚又有 meeting， IEEE GOLD 嘅 meeting， 過兩個禮拜有 General meeting 要開， 話時話以前喺大學開嘅乜 soc 嘅 AGM， 開親就係俾人狂插， 唔知為乜開嘅會， 今次終於都到自己要準備喇， 不過應該都冇嘢好插喇， 一來啱啱起步， 二來跟本就冇預算， 所以都係以一個閧荒牛嘅角色去做， 做足自己要做嘅嘢就應該 OK 喇。 不過點為之做足， 有時亦都好難講...
Hi chew 嘅榴槤味...
2009/10/12（月曜日）
晨咁早出門口， 約咗羽毛球友 BBQ， 其實今日真係唔知會有幾多個人嚟， anyway 九點去到東陽町， 會合今次嘅搞手 T 君， 佢先嚟講咗句“唔知今日超級市場開幾多點... ”， 真係嚇鬼死自己， 好在間嘢開 24 小時， 如果唔係真係傻間間等運到。
買完嘢， 坐車去到目的地， 都幾遠， 但係個景就真係幾靚。 開始透爐， 全部過程都比起想像中要多時間， 冇辦法， 過咗一段時間之後終於起到個爐， 但係 H 君因為有事做， 快快手手燒咗塊豬同幾舊雞之後就走鬼咗人... 都冇計， 結果剩得四個人...
一路係咁食， 一路吹水， 最後啲ジンギスカン基本上都食唔哂， 於置， 走咗去第二度吹水。 都好喇。 不過講啲話題都幾怪， 唔知點解可以講講吓講咗去柔順劑嗰度...
本來想就咁返屋企， 點知突然收到 P ちゃん電話， 出咗嚟一陣傾計， 點解突然搵自己呢？ 呢度唔方便講太多喇， 但係對面個女仔喊自己真係唔知可以點樣好囉？ 希望佢快啲冇事就係啦。 食咗少少嘢之後陪佢去睇啲嘢， 之後返屋企已經係想死喇。 但瞓上張床時又唔知點解眼光光... 大鑊...
Anyway, 今日嘅相
2009/10/11（日曜日）
戦利品：
ハヤテのごとく！！ キャラクターＣＤ ７，８
らき☆すた ７
生徒会の一存 ２
撞鬼， 過咗十二點先起到身。 咁落去真係會有唔少問題囉， 本身已經唔係咁健康㗎啦， 仲要日日咁整殘自己命都隨時短幾年。
下晝約咗新朋友 R 君飲嘢， 吹水吹水， 講嘅話題雖然都係比較表面， 不過都以外地好傾。 另外 R 君因為都唔係関東人， 講嘢都有啲口音囉。 咦？ 原來自己都開始聽得出少少口音喇？ 以前基本上連関西弁同埋標準語都可以分唔到... 有啲進步啦。
買完啲戰利品， 返屋企悠悠閒閒咁過， 都仲係調較緊個生理時鐘。
2009/10/10（土曜日）
羽毛球日， 今日約埋上個禮拜識嘅 M 君一齊去， 佢話自己係初心者喎， 不過始終有玩開運動嘅人 sense 都真係唔同啲， 打波嘅反應等等完全可以玩得吓， 如果自己唔係經驗好過佢未必夠佢打都唔定。
着咗都好耐嘅嗰對鞋， 今日終於都升天喇， 嗰對鞋， 諗吓諗吓， 都好似係以前喺科大嗰陣時買嚟打壁球用... 咦？ 咁講法咪即係打咗成七年都有？？
2009/10/9（金曜日）
返學校做嘢， 唔， 都仲係有少少停滯不前嘅感覺， 其實有時真係要心問自己， 有啲乜嘢唔滿意呢？ 有好多嘢其實都可以好求其咁做， 就係唔知邊度走啲死人潔癖出嚟， 不過真係到時間喇， 好快就要面對畢業呢個問題， 有時覺得咁樣畢業其實有冇問題呢？ 咁嘅三年真係值得一個 PhD degree？
好鬼矛盾， anyway 呢一日都做唔到好多嘢。 六點左右有個 for international students 嘅 party， 即管去玩吓， 上兩年都因為廣東話班冇去喇， 今年去， 有見過好多好多次嘅面口， 亦有更多唔識嘅人， 幾有趣， 其中見番上個禮拜去池谷時偶遇嘅 M ちゃん， 完全兩個人囉， 果然“村姑”同埋“城市人”可以有好大出入。 另外 ITC 上個 sem 嘅同事 M ちゃん， 傾咗唔少嘢， 以前番工都冇乜點傾， 但係估唔到原來佢某程度係一個オタク囉！ 真係諗都冇諗過... 但亦因為咁所以先可以傾唔少嘢喇， 呢一餐都算係非常之 enjoy 喇！
而其中最奇怪嘅係， 叫做識咗好耐嘅 S 先生， 雖然平時冇乜幾句， 不過今日突然嚟問我“你係邊個 lab 㗎”？ 真係完全冇嘢可以講。 就算唔係同佢同一個 lab 唔同 department， GCOE 都開過幾次會啦？ 唔係咁都唔記得呀嘛？
2009/10/8（木曜日）
個風殺到嚟， 不過出乎意料， 出面鬼咁好天， 風係好大， 不過陽光普照， 真係有啲懷疑發生緊乜嘢事， anyway 有啲電車都好似停咗， 但係矢上唔知點解下晝就復課囉。 唔， 都好， 有 part time 返好過冇嘛。
返到去 ITC， 主力都係試過 Drupal， 唔知點解就係唔想用人人都用嘅 Wordpress， 其中一個原因可能係唔鍾意 MySQL 啩？ anyway setup 都唔算太難， 加一加二都冇太大問題 （file permission 仲未 set 好）， 但係要 migrate 呢個 blog 過去又好似唔係簡單咁。 唔， 點解呢？
anyway 尋日瞓得唔好， 超眼瞓...
2009/10/7（水曜日）
返學校做嘢， 其實都好多 code 唔知點入手好， 用最傻嘅方法一定可以解決到個問題， 不過自己就係自己唔可以接受囉， 有時呢個咁嘅性格都真係搵自己嚟煩...
之後去剪頭髮， 話時話都好耐冇去剪喇， 一路都想去， 但就係搵唔到一個好時間去， anyway 剪完， 成個人都精神啲～！
台風嚟緊， 落大雨， 聽日都唔知點好， 咁嘅雨勢返學校嘅話真係殺咗我好過.... anyway 瞓唔着， 撞鬼...
2009/10/5（月曜日）
前日努力工作， 尋日都冇乜嘢， 唔知點解今日先嚟筋肉痛 orz... 不過點都要返學校。
叫做寫好嘅論文再俾先生睇， 唔， 打回頭， 原因係要寫多啲 simulation 結果.. 咦？ 之前都冇聽佢提過㗎？ 結果就係要繼續加啲 simulation result... 冇計... orz...
上完個唔知發生乜嘢事嘅 GCOE lecture， 返屋企休息...
今日朋友 Kさん生日， 照一路以嚟嘅慣例， 打電話， 話時話好似都 keep 咗好多年打俾佢咁？ 有時都覺得幾不可思議...
2009/10/4（日曜日）
池谷 その三
又係晨咁早起身嘅一日。 執好個人之後一齊行咗陣山， 入到一個森林裏面， 第一件感激嘅事就係朝早嘅太陽真係好靚囉， 咁都可以明白點解農村嘅人點解可以咁早起身（？）。
跟住其中一個地方， 見到好多張椅吊咗喺度， 原來係其中一個人嘅藝術作品， 唔只睇得， 仲可以坐上去當韆鞦玩， 玩吓， 影吓相， 幫手做少少雜務， 都仲係好眼瞓，都仲頂得順啩？
返去食完早餐之後， 又坐車去到一個地方， 掛起尋日收割嘅禾稻， 話時話尋日都真係割咗唔少， 今日其實都冇乜體力， 所以幫咗少少手之後主要都係顧住同人吹水多。 反正人手多嘛， 自己乜都做哂就唔係幾好啦。
工作， 都總算完哂， 影吓相之後， 返到去古民家之後就準備吓回程嘅嘢， 同埋係咁影相。 走之前坐車去到另一座山， 離遠望到學校， 古民家同埋幾戶池谷人家， 個境真係一流。 算喇， 講太多都冇用， 睇相應該仲實際。
回程， 其實到呢個程況真係已經行動不能喇... 呢三日真係做咗好多㕧怈仔都未必有機會做嘅嘢喇。 哈哈， 或者老後真係會搵塊田嚟耕都唔定？ 邊個佢到吖。
不過話時話， 呢 group 人意外地多浜っ子， 竟然可以五個人一齊坐京急返屋企...
2009/10/3（土曜日）
池谷 その二
一早起身， 負責幫手準備早餐， 有熟手技工嘅時候就自然唔輪到自己整喇。 同埋自己雖然唔係唔識整嘢食， 不過做嘅方向性真係同大路唔同， 所以都係幫手做其它嘢會簡單啲。 anyway 一朝早連埋其它 group 一共廿幾人， 食飯。
食飯之後準備落田， 揀咗啲裝備， 基本上都係失敗， 對 boot， 明明寫 27cm， 鬼咁大對， 件雨褸， 鬼咁焗， 不過呢啲嘢都真係落咗田先覺得。 anyway 今日去嗰塊田， 要坐車去， 坐乜車呢？ 就係貨車， 幾個人坐喺貨車裝貨嗰個位， 都幾過癮， 而且因為山路， 某程度嚟講比起過山車更加刺激（過山車你明知佢係安全嘛）。
去到塊田， 落雨... orz... 跟住學咗點樣割禾（唔係割禾青）， 之後就拎住把鎌刀係咁割割割， 幾過癮， 不過最大問題就係因為落雨而出現嘅泥沼... 一個唔覺意真係名副其實“泥足深陷”， 真係幾大劑， 真係要好好揀地方嚟行囉。
收割， 休息， 收割， 休息， 午飯， 收割， 休息， 休息， 真係平時唔多體力勞動， 一做就真係大汗搭細汗， 不過去到某個程度就會唔覺攰， 係咁割割割。 結果集各人之力， 總算割完成塊田！ 自己都覺得好勁！ 之後要做嘅呢， 就係將割好嘅禾掛起風乾， 以外地有趣嘅一個過程喇！ 一個人爬上梯， 下面嘅人就係咁拋啲禾上去掛， 好多人都唔知點解唔夠力拋囉。
之後都總算完咗今日嘅工作， 又去溫泉， 話時話去咁多次溫泉， 今次一定係最舒服嘅一次， 真係做嘢做得太摶命都唔定喇？ 而且唔知點解好好彩， 回程時有得睇煙花！ 有賺！
返到去， 燒嘢食。 唔知點解自己無端端企咗喺個爐邊， 不斷幫手 serve 人， 可能已經俾人睇穿咗自己係唔托手㬹嘅人都唔定啦？ 結果就左右手筷子， 一隻手用嚟幫人燒嘢， 另一隻手就自己食， 都真係服咗自己點解可以食得咁忙... anyway 一路食一路吹水， 有乜嘢比咁樣更加開心嘅嘢先？ 加上今日中秋， 屋企人突然打電話嚟同自己傾計， 唔係傾咗好耐喇， 不過真係幾 warm 喇！
燒得七七八八， 圍住喺個爐邊吹水， 爐邊有自己之前幫手斬嘅柴， 其實當時應該係好眼瞓㗎喇， 不過都係咁吹多陣水先算。 始終過埋聽日就冇咁多時間 meet 喇嘛。
2009/10/2（金曜日）
池谷 その一
應朋友 M ちゃん邀請， 去一個叫池谷（新潟県）嘅地方。 事前有嘅情報... 唔， 位於山上嘅一個小部落， 只有幾個家庭， 全部以耕作維生， 年輕嘅都已經出咗都會工作， 而剩低嘅都係比較上咗年紀嘅人... 等等。
唔， 一個自己都冇乜點樣想像過嘅地方喇。 anyway 去池袋集合， 自己都真係要寫個服字， 每次去啲未去過嘅地方都會落雨， 今次亦都冇例外， 早咗少少去到池袋， 落大雨， 唔理咁多食個早餐先講。 食完， 去集合地點， 冇人， 唔知點好， 唔， 都冇乜大問題嘅， 呢個世界有電話呢樣嘢咁嘛。
... 唔？ M ちゃん嘅 contact 裏面剩係得 mail address， 冇電話... orz... 好在有 M ちゃん嘅朋友嘅電話， 確定之下， 好在都差唔多嚟到。 真係服咗自己。 anyway M ちゃん同埋兩個朋友 M くん同埋 A ちゃん， 一行四人， 出發。 好在， 新認識嘅朋友都比較好傾喇。
去到一個叫六日町嘅地方， 會合一個 staff， 跟住就由佢車我哋周圍去買嘢先。 因為池谷全部都係田， 至少肉類等等都要由外面買入去， 四個人買咗幾車嘢， 都咪話唔嚇人。 嗰張鬼咁長嘅收據都真係冇幾可見到。
之後到達今次嘅目的地。 完全融入大自然嘅一個村落， 除咗幾間屋同幾塊田之外， 基本上就係山山山。 Anyway 開始整嘢食， 一個廚房四個人， 都做唔到太多嘢喇。 幫手執頭執尾， 四點幾都總算有嘢食。 不過， 好大煲麵！！ 點食呀！ 不過一路咁講， 唔知點解自己又一路食得哂㗎喎？
之後去散步， M ちゃん帶咗我哋去村落嘅幾個人家， 村落裏面嘅お父さん同埋お母さん， 一行幾個人除咗 M ちゃん之外基本都係陌生人， 不過呢度嘅村民都無任歡迎囉！ 真係同都市嘅感覺好唔同。 六點幾已經食晚飯， 好早亦都會瞓覺， 所以某程度真係有啲打攪佢哋喇。 而最奇怪嘅係.. 唔知點解我嚟度呢度都喺度睇電腦嘢... 話說一個お母さん嘅相機嘅 memory card 好似冇哂 record， 係啲幾有紀念價值嘅相喇。 M ちゃん提議搵 undelete program， 搵咗陣， 整整整， 去完溫泉之後再整， 唔， 都 OK 啦？ 比起想像中順利， 冇咗嘅相都還完返， 好好。
講返個溫泉， 要坐車坐成半個鐘先去到， 不過又真係幾唔錯嘅。 人又唔係太多， 露天嗰部份都幾舒服， 而且好在冇落雨喇。 舒舒服服～～
同 M ちゃん睇完部機返到去， M くん同埋 A ちゃん等我哋開飯， 準備開飯時其它 members 都陸續嚟到， 食咗嘢先算， 好鬼肚餓（當時都十點幾差唔多十一點喇）。
返到去古民家（呢三日 stay 嘅地方）， 過咗少少 briefing 同埋自己紹介， 係時候瞓覺... 聽日要晨咁早起身準備早餐喇。
2009/10/1（木曜日）
眼瞓， 不過都冇辦法， 要返去 ITC 做 parttime， 不過好彩嘅係新學期都總算開始咗， 所以 shift 返一點， 所以遲啲出門口都唔係問題。
新 shift， 同上年唔脵嘅係上年 part 開嘅其中兩個人變咗喇， 今次兩個都係同一個 lab 嘅 M1， 唔， 兩個人就基本上好熟， 都幾好玩咁， 好多嘢可以講（雖然做緊嘢時就始終唔可以講太多嘢喇）， anyway 今日始終都係學期頭， 點都比起平時多嘢做㗎喇。
返屋企前準備一吓聽日去耕田嘅嘢... 始終都冇啲雜物要買喇。